رواية حصنك الغائب بقلم ډفنا عمر الجزء الرابع

بذات الانبهار ماشاء الله! جمال المكان مش طبيعي.. أنا متهيئلي هفضل صاحية الليل كله مش هنام واحرم عيني من السحر ده! حقيقي شكرا لتعبكم!
ربتت كريمة على كتفها البيت كله تحت أمرك اسهري وخليكي براحتك.. ثم واصلت بزهو المهندسة عطر بنت اختي اللي صممت الزاوية دي وأدهم وفرلها كل طلباتها عشان يطلع المكان كده وقال ده هيكون مكان مميز نقضي فيه سهراتنا لما تيجو وكل تجمعاتنا الحلوة وخصوصا رمضان ومافيش أحلى من تشريفكم اللي نور البيت كله!
ابتسمت عبير وعيناها تنهل من سحر المكان براحة ربنا مايحرمنا من لميتكم حوالينا! 
وواصلت تحدث زوجها محمد انا عايزة ركن زي ده في حديقتنا وإلا مش همشي من بيت أخوك!
ضحكوا جميعهم ثم هتف زوجها من غير ماتقولي.. كنت ناوي على كده وهخلي عطر اللي تصممه بصراحة البنت دي موهوبة جدا جدا..! 
زمزم التي شاركتهم الرأي بصراحة انا حقيقي معجبة بشغلها ليها حق تختار مجال الهندسة وتتخصص في التصميم!
عابد باعتراض وغيرة مضحكة هو كل الشكر ده لست عطر لعلمكم أنا مفاجأتي هتكون أحلى من القردة دي! 
زمزم طب إيه هي المفاجأة يا ابن عمي!
تمتم وهو يضم ياقة قميصه بغرور مضحك 
مابحبش اتكلم عن نفسي كتير بس هتنبهري!
قهقهة محمد والله أنا مبهور من غير حاجة يا حبيب عمك.. بس لعلمك انتو لعبتوا في الملعب لوحدكم لو يزيد هنا كان بدع هو كمان ومحدش فيكم كان فرد عضلاته.. دي لعبته!
أتى أدهم حاملا الصغير مهند وهو يداعبه لا سيبك من كل ده يامحمد أحلى ما في الليلة دي كلها ومخلي المكان والقعدة ليها طعم هو هوندة حبيب جدو أدهم!
ما أن أبصروا الصغير حتى تقاذفته الايادي متسابقين بحمله لتدليله ومداعبته.. وبعد قليل توافد عليهم أسرة ناجي الذي عانق رفيقه بلهفة 
_ أخيرا شوفتك يامحمد.. واحشني ياغالي..!
عانقه الأخير بمشاعر مماثلة أنت اكتر ياناجي والله ..ثم شمله بنظرة متفحصة بس عجزت بدري كده ليه. وبعدين إيه الكرش ده كله انا كنت سايبك مفتول العضلات ورشيق ياصاحبي!
قهقهة أدهم على حديث شقيقه معلقا 
مش ناجي بس يا محمد.. بص على كرش اخوك الأول وبلاش إحراج ياعم.. أنت كنت في دولة أوربية والحياة فيها مختلفة!
أردف ناجي مشاغبا وهو يمازح رفيقه سيبه يتريق علينا براحته يا أدهم.. هو شهر واحد هياكل الرز المعمر والمحاشي واللذي منه.. ويبقى يكلمنا عن رشاقته بعد كده! 
ضحك محمد ثم نظر لعطر وتمتم تعالي ياحبيبتي اما اشكرك على لوحة الإبداع اللي صممتيها.. وواصل وهو يحدث ناجي  
والله وعرفت تجيب بنت فنانة ومرهفة يا صاحبي!
رد الأخير بمزاح طالعة لأبوها طبعا
فدوة باستنكار نعم لا طبعا دي نسخة مني.. انت أخرك تبيع محصول القطن بسعر كويس صح ولا لأ
غمغم ناجي بصوت مسموع أضحك الجميع 
هو الواحد مايعرفش يفشر شوية من نفسه!
ضحكت عطر وردت بتهذيب شكرا يا عمو.. دي اقل حاجة نعملها فرحة وصولكم بالسلامة!
ثم تبادلت التحية مع الجميع! وجاءت لحظة هدية عابد المميزة.. بعد أن طلب من الجميع الصمت وأطفأ الإضاءة.. وبث من خلال شاشة عرض صخمة فيديو خاص جمع فيه كل صور الطفولة القديمة التي تخص الأشقاء عاصم وأدهم ومحمد مع والديهم يصاحبها أغنية تناسب أجواء الذكريات القديمة.. ومع كل صورة ضوئية تعرض تزحف دموع محمد وأدهم وهما يستعيدان لحظات طفولتهما البعيدة.. ثم. أختتم. أخر دقائق بصور الجميع بكل مراحل أعمارهم.. طفولة جوري وعابد ويزيد وبلقيس وعطر وياسين وايضا زمزم ومحمود.. ولم ينسى خالته فدوة والعم ناجي ثم صورهما الحديثة التي ختمها دعاء رائع بدوام تلك الأواصر الدافئة بينهم طوال العمر..!
بمجرد انتهاء الفيديو.. صدع تصفيقهم مع صافرات ياسين الحماسية لهدية عابد التي أسعدت الجميع بحق وجعلت أحداقهم تزرف دموع الحنين لأيام مضت!
نهض محمد انت رجعتني 20 سنة الفيديو ده عابد.. ربنا يفرح قلبك يا أبني..!
بادل العم عناقه الحمد لله إن عجبك هديتي ياعمي وعلى فكرة حطيته على سي دي وعملت نسخ للكل عشان نحتفظ بيه.. التليفون مش مضمون!
أدهم وهو بجفف دموعه طلعت حسيس يا واد ياعابد أمال سايق علينا جنان ليه على طول
مازح أبيه أهي لحظات وبتروح لحالها يا حاج
عبر الجميع عن إعجابه بصنيع عابد وظلوا جميعهم يتبادلون المزاح وحديث الذكرايات