لا تخبري زوجك للكاتب عمرو راشد

جوزها وهي بتحبك يا حبيبي بس انت عارف دلع البنات بقا
دي قالتلي انت مش راجل يا حماتي.. تخيلي في واحدة تقول ل جوزها كدا يا جدعان
راجل يا حبيبي وسيد الرجالة
بعدها بصتلي وقالت بجمود
اعتذري ل جوزك 
بصتلهم وهما قاعدين وشايفة في عنيهم نظرات الشماتة والفرحة
انا اسفة
قولتها ودخلت جري على اوضتي وقفلت على نفسي.. وقعت على الأرض ودموعي نزلت مكنتش مصدقة ان امي تعمل فيا كدا قدامهم.. مكنتش متخيلة انها ممكن تذلني بالشكل دا.. حسستني اني رخيصة أوي في نظرهم.. مفيش حاجة وجعتني قد القلم بتاعها اللي كسرني قدامهم هو دا الجواز اللي كنت بحلم بيه هي دي العيلة و الزوج اللي كنت عايزاهم طبعا لا أنا عمري ما كنت اتمنى كدا بس الظاهر ان الافلام أثرت على دماغي شوية.. بعد نص ساعة تقريبا امي خبطت على باب الأوضة.. قومت فتحتلها

يلا عشان جوزك يردك
مسحت دموعي وخرجت.. كان هو و امه لسة قاعدين.. روحت وقعدت قدامهم ساعتها امه اتكلمت وقالت
خلاص يا حازم المسامح كريم وهي ان شاء الله مش هتغلط تاني.. صح يا ريهام
منطقتش ب ولا كلمة واكتفيت بالسكوت.. زعق حازم ساعتها
شايفة مش بترد عليكي ازاي
امه طبطبت عليه
خلاص بقا يا زمزومي قلبك ابيض.. هي ريهام كويسة وهتسمع كلامك بعد كدا
ماشي اما نشوف
بص ليا وقال بكل تكبر
خلاص يا ست ريهام انا رديتك.. يكش بس نحترم نفسنا بعد كدا
من بعد اللحظة دي وانا اتحولت ل شخص تاني خالص.. شخص ساكت مبينطقش على اي حاجة.. مليش أي رد فعل وبقيت بعمل زي أي واحدة فعلا اعمله اكل و اغسله هدومه و اهتم بنضافة البيت وخلاص.. حتى لما هو بيكلمني او بيفتح معايا مواضيع كنت برد على قد الكلام وبس.. زي ما يكون فقدت الشغف أو بمعنى أصح فقدت جزء من

روحي.. حاسة اني اتطفيت.. كل حاجة بقت بالنسبالي عادي مبقاش في حاجة تأثر فيا حتى امه وتحكماتها وبالمناسبة هي لسة بتدخل الشقة و بتدور في دولابي برضو بس انا ساكتة مبنطقش.. ماشية بمبدأ اللي عايز يعمل حاجة يعملها.. لحد ما في يوم كانت ماما معزومة عندنا.. وهو نزل جاب امه وطلعو قعدو مع ماما لحد ما انا اخلص اكتشفت ان الزيت خلص وانا كنت محتاجاه جدا.. ساعتها خرجت من المطبخ وندهت عليه
بعد اذنك ممكن تنزل تجيب زيت عشان هو خلص
وانتي ازاي متكونيش عاملة حسابك في زيت
مكنتش اعرف أنها اخر ازازة عندي
طب مانا كلمتك وانا راجع من الشغل وسألتك عايزة حاجة وقولتي لا
طيب انا محتاجاها دلوقتي.. من فضلك انزل هاتها
و انزل انا ليه.. ما تنزلي أنتي
انزل انا!!
اه تنزلي انتي ايه المشكلة يعني.. انا قاعد مع امي دلوقتي
يعني انا اللي واقفة من الصبح في المطبخ عايزني انزل عشان ارجع اكمل وقفة تاني
مش دا شغلك برضو
لا محدش قالك اني خدامة والله
اتكلمي ب احترام يا ريهام
انا بتكلم ب احترام والله.. شوف طريقتك انت
مالها طريقتي.. قولتيلي انزل ومش نازل.. والله العظيم مانا نازل ايه رأيك بقا
تمام متنزلش.. انا هكلم البواب يجبهالي
لا متكلميش حد وأنتي اللي هتنزلي تجبيها
وانا مش قادرة انزل يا حازم
يعني ايه مش قادرة تنزلي.. بتعملي ايه انتي طول اليوم عشان متبقيش قادرة
مبعملش حاجة يا حازم.. وبرضو مش هنزل
هتنزلي يا ريهام
امي و امه دخلو المطبخ على صوتنا.. امي اتكلمت
في ايه يا ولاد
رد عليها وهو لسة بيزعق
الهانم بقولها انزلي هاتي ازازة زيت عشان تكمل باقي الاكل ومش عايزة
خلاص يا حبيبي مش مشكلة انا هنزل اجيبها
لا يا حماتي خليكي.. هي اللي هتنزل
ساعتها رديت عليه
وانا مش هنزل يا حازم
شكلك عايزة تتطلقي
لو انت راجل اعملها بقا
انا راجل و راجل اوي كمان.. روحي وانتي طالق
امي صړخت فيه
يخربيتك دي التالتة 
بقلم عمرو راشد
بدأ يبصلها مرة ويبص ل امه مرة واللي برضو كانت بتزعقله.. ساعتها كانو هما في وادي وانا في وادي تاني خالص.. كنت مبسوطة وحاسة اني اخيرا خلصت منه.. امي طلبت المأذون وجه وثق عقد الطلاق واتفقنا ان بعد شهور العدة اقرر اذا كنت هرجعله ونتفق مع محلل او كل واحد يشوف حياته.. ومن ساعتها بدأت ابص ل حياتي و اول حاجة عملتها اني نزلت شغل عشان اقدر ابعد شوية واتشغل في اي حاجة.. انا اساسا خريجة تربية قسم رياض الأطفال و دا ساعدني الاقي شغل بسرعة في مدرسة كويسة وبدأت أحاول استعيد نفسي من جديد.. الايام بدأت تمر بسرعة والشهور عدت وأدركت ان مدة العدة خلصت.. عرفت لما لقيت امي جاية تكلمني وتقولي
ام حازم كلمتني عايزة تسألك لو كنتي عايزة ترجعي ل حازم ولا لا
مستحيل يا ماما انا مش هرجع للبني آدم دا
اومال عايزة ايه.. هتقعديلي كدا من غير لازمة
هشتغل واشوف مستقبلي
الكلام دا تقوليه لو كنتي لسة انسة.. إنما انتي دلوقتي انتي مطلقة يا حبيبتي فاهمة يعني ايه يعني الناس مش هتسيبك في حالك 
والمطلوب مني ايه
ترجعي