نوفيلا حارة رمضان الجزء الأول

يكفي محاولة منهم تشعرها أن لها حائط تميل عليه يوما إن تعثرت بها الحياة أكثر..
___________
بغير رضا مشط البضاعة التي أحضرها هارون من العتبة ويرصها على الأرفف أمامه 
_ فوانيس دي ولا لعب أطفال
ابتسم لأبيه ماهو ده اللي ماشي اليومين دول.. الشغل الصيني مغرق الدنيا عشان سعره حنين.. والعيال بيحبو أشكال بكار وبوجي وطمطم والحاجات دي يعني..ده حتى محمد صلاح دخلوه في شغل رمضان.
غمغم العجوز مستاء كمان والله أيامكم غريبة ..مافيش أحلى من الفانوس الصاج ابو شمعة بتاع زمان.. هو الأصل والباقي مالوش طعم.. 
_ كل وقت وله أدان يا حاج..المهم هتيجي هتفضل معايا في المحل ولا ترجع البيت مع الواد كريم تستنوني
_ لا هفضل هنا ونرجع كلنا سوا علي معاد الغدا. 
_ ماشي اللي يريحك يا حاج..ارتاح وهطلب من القهوجي اللي في الحارة كوبايتين شاي يظبطونا احسن المشوار وزحمة الطريق صدعت دماغي. 
_________
توجهت تفتح بابها وتتبين الطارق ليبتسم وجهها بمحبة يا مرحب يا ام فوزي.. اتفضلي. 
_ يزيد فضلك يا ام سيف..كل عام وانتي بخير. 
_ وانتي بالصحة والسلامة يا حبيبتي. 
_ أنا قلت قبل ما اروح السوق اعدي عليكي لو عايزة حاجة. 
_ تسلمي متحرمش من كرمك تعالي قبل ما تنزلي نشرب حبة شاي.
. 
_ أخص عليكي بقي تبقي محتاجة وماتخبطيش على بابي هو احنا مش اخوات 
_ واكتر والله بس أنا عارفة البير وغطاه.. العيشة صعبة على الكل.. انا دورت علي شغل ولقيت بس كله هيخليني اغيب عن عيالي اليوم كله وانتي عارفة انهم لسه صغار.. مين يراعيهم في غيابي.. نفسي الاقي شغلانة اعملها وانا وسطيهم وعيني عليهم. 
_ هتلاقي يا حبيبتي ربك. هيبعت رزقهم ماتقلقيش. 
_ ونعم بالله..معلش زعلتك على الصبح بس ماليش غيرك افضفض معاه. 
_ عيب عليكي الكلام ده ..هقوم بقى عشان الحق اتسوق وارجع..
طنط شوفتي ماما عملتلي ايه
استوقفها صياح الصغيرة فغمغمت لما بيديها بانبهار الله حلوة اوي العروسة ده.
الطفلة بزهو كمان يا طنط ماسكة فانوس في ايديها ماما عملتلي اتنين عشان رمضان. 
ابتسمت لابنتها بحنان مبروك عليكي ياحبيبتي يلا روحي العبي متعطليش طنط ام فوزي عشان تلحق السوق.. ثم حدثت جارتها انتي عارفة الفوانيس غالية والظروف صعبة..اتصرفت بخامات مركونة عندي وعملتلها عروسة ماسكة فانوس كرتون في ايدها غلفته بحتة قماش خيامية قديمة..قلت اراضي العيلة وافرحها والحمد لله عجبها اوي ومخبياه عن أصحابها عشان يشوفو ليلة رؤية رمضان.
هزت الجارة رأسها بشرود وفكرة ما تبرق بعقلها لتهتف بعدها بحماس شديد 
لقيتها يا ام سيف..رزقك تحت رجلك يا طيبة وانتي ولا دارية بحاجة. 
زوت مابين حاجباها رزق ايه مش فاهمة
تحمست وهي تجلسها و تشرح لها هفهمك انتي تقدري تستغلي موهبتك وتكسبي وانتي معززة مكرمة وسط عيالك العروسة اللي عملتيها دي هي اللي هتكفيكي شړ الحاجة.. هنعمل بس عليها تعديل بسيط جه في بالي.. فستانها والطاقية بتاعتها هتبقي من قماش الخيامية وهنحط فيها الجهاز الصغير ده اللي بيغني أغاني رمضان مش اغاني عادية.. وتبيعي بسعر معقول وتكسبي..ايه رأيك بقي في الفكرة دي
بدت تستجيب لحماسها فكرة حلوة اوي يا ام فوزي بس منين اجيب الخامات انا هحتاح قماش وعرايس ودواير كهربة بتنور وتغني وقبل كل ده مين يعرفني وهيرضى يشتري مني ده فاضل أيام ويهل رمضان واللي اشترى اشترى خلاص.
_ مين قالك كده وبعدين انتي هتعملي منتج مختلف عن اللي في السوق.. الفكرة دي جديدة وليكي عليا اكون اول زباينك وهعرض بضاعتك علي كل معارفي في الحارة.. والأحلى بقي من كل ده.. هارون! 
_ هارون بتاع الفوانيس
_ طبعا.. هو اللي ممكن يروج بضاعتك في محله وإن مشيت هيشتريها كلها ولا هنحتاج نروج عند فلان ولا علان.. ايه رأيك
_ ماشي يا ام فوزي كده فاضل برضو اهم مشكلة.. الفلوس.. منتش غريبة أنا ممعيش حاجة..إلا لو ابيع حاجة من دهبي و ..
_ لا لا دهب ايه اهدي علي نفسك دول سيبهم للزمن انتي محتاجة مبلغ بسيط وده سيبيه علي الله وعليا.. أنا قابضة جمعية من ورى جوزي وركناها لزنقة رمضان.. نصها هيكفي لوازمك كلها..ولما ربك يفرجها من شغلك ابقي رجعيهم.
اغرورقت عيناها لا تصدق كل هذا الدعم من جارتها دعم لم تجده مما تجمعها بهم صلة ډم وقرابة.
_